அகத்தில் ரஜஸ்வலை காலத்தில் இருக்கும் பெண் பாத்திரம் தேய்த்துக் கொடுக்கலாமா? (வேலைக்கு ஆள் இல்லை என்பதால்) அவ்வாறு தேய்த்துக் கொடுக்கலாம் என்றால் எப்படிச் சுத்தி செய்து எடுத்துக்கொள்வது?
Vidwan’s reply:
ரஜஸ்வலை காலத்தில் பெண்கள் பாத்திரம் தேய்த்துக் கொடுக்கக் கூடாது. அது தவறு. அந்தப் பாத்திரத்தை எடுத்துக் கொள்ளக் கூடாது. வேறு வழியே இல்லாமல் எடுத்துக் கொள்வதாக இருந்தால் அதை லேசாக தணலில் காட்டி பின்பு முறைப்படி சாணியால் சுத்தி பண்ணி எடுத்துக் கொள்ளலாம். அதுவும் இரண்டாம் பக்ஷம் தான். ஆனால் எந்தக் காரணத்தினாலும் பெருமாளுக்குத் தளிகை பண்ணும் பாத்திரங்களுடன் அதைச் சேர்க்கவே கூடாது. அதனால் அதைக் காட்டிலும் அதை எடுத்துக் கொள்ளாமல் இருப்பதுதான் நல்லது.
எனக்கு 40 வயது ஆகிறது. ரஜஸ்வலை சமயத்தில் quilt மெத்தை பயன்படுத்தலாமா? அல்லது பாயுடன் சேர்ந்த மெத்தை பயன்படுத்தலாமா? எனக்கு முதுகு வலி பிரச்சனை இருக்கிறது. பயன்படுத்தலாம் என்றால் எப்படிச் சுத்தி செய்வது என்பதையும் சொல்லவும்.
Vidwan’s reply:
உங்களுக்கு முதுகு வலி இருக்கிறது என்று சொல்லி இருக்கிறீர்கள். அதற்காக ஒன்று செய்யலாம். ரஜஸ்வலை காலத்திற்கு மட்டும் ஒரு தனிப்பட்ட மெத்தையை வைத்துக் கொள்ளலாம். மற்ற சாதாரண நாட்களில் வேறு ஒன்று என்பதாக வைத்துக் கொள்ளலாம். அந்தச் சமயத்தில் அதை ப்ரோக்ஷணம் பண்ணி வைத்துக்கொண்டு மற்ற நாட்களில் அதை உபயோகப்படுத்தாமல் இருப்பது என்று செய்யலாம் என்று தோன்றுகிறது.
நம் ஸ்ரீ வைஷ்ணவ மணப்பெண் கல்யாணத்தின் பொழுது எந்தப் பக்கம் ஆண்டாள் கொண்டை அணிய வேண்டும்? இடது பக்கமா? வலது பக்கமா? எது சரி ?
Vidwan’s reply:
விவாஹத்தின் போது ஆண்டாள் கொண்டை இடது பக்கம் அணிய வேண்டும்.
ஸ்த்ரீகள் விஷ்ணு ஸஹஸ்ரநாமத்தில் எந்த ஶ்லோகம் வரை சேவிக்கலாம்? எனக்கு வெகு நாட்களாக இந்தச் சந்தேகம் இருக்கிறது. அதனால் நான் இதுவரை பல ஶ்ருதி மட்டுமே சேவித்து வருகிறேன். தயவுசெய்து விளக்கவும்.
Vidwan’s reply:
பொதுவாகவே ஸ்த்ரீகள் ஸ்ரீ விஷ்ணு ஸஹஸ்ரநாமம் சேவிப்பதென்பது ப்ராசீன ஸம்ப்ரதாயத்தில் கிடையாது. ஆதலால் இக்கேள்வி இங்கு ப்ரஸக்தி கிடையாது.
பலஶ்ருதி மட்டும் என்பது எந்த அடிப்படையில் கேட்டுள்ளார் என்று தெளிவாக புரியவில்லை. ஏனென்றால் பலஶ்ருதி என்பது பாராயணம் பண்ணியதன் பலனைச் சொல்வது. பாராயணம் பண்ணாமல் பலஶ்ருதி இருப்பதில் அர்த்தம் இருப்பதாகத் தெரியவில்லை.
